मुगा जाग्रा बिफां सोरजिनाय एबा दिहुननाय आरोंदामिन

मुगा जाग्रा बिफांनि फारिलाया जोबोत गोलाव। नाथाय बिनि गेजेराव गाहायै मोनब्रै रोखोमनि बिफांखौ मुगा एम्फौआ गनायो। चोम, सवालु, दिधलति आरो मेजांकरि बिफां आव आसामनि सुबुंफ्रा मुगा एम्फौ फिसियो।

चोम बिफां नार्चारी बानायनायनि आदब-खायदा:

चोम बिफांनि नार्चारी लाहार-फाहार खालामनो थाखाय दै थाबथायै गोजौ जायगा सायख’नानै लानांगौ।
30 चेन्टिमितार सो गोथौ हाखौ मिहियै एवनानै लानांगौ।
एवनानै लानाय हायाव 5 1.5 मितारनि ख’था बानायनांगौ आरो ख’थाफ्रा 15-20 चे:मि:गोजौ जानांगौ।
बेबायदि मोनोनै ख’थानि जानथाया 30 चे:मि:जानांगौ जाहाथे नांगौ जायोब्ला दै दिहुनगारनाय आरो सिखोन-साखोन खालामनो राहा थायो।
5 किउबिक फित गोबोरखि गोरानखौ हाजों मोजांयै लगायनानै लानांगौ।

जोलै बुथुमनाय आरो सोदांनाय:

एप्रिलनिफ्राय जुन दाननि गेजेराव रानाय जोलै बुथुम नांगौ।
बोहैनाय (Running) दैयाव जोलैफोरखौ मोजांयै सुनानै गुसु जायगायाव लामनांगौ।
दैयाव गोजावनाय जोलैफोरखौ बासिनानै गारनांगौ आरो गाहायाव थानाय जोलै बेगरफोरखौ जोलैथिलिनि थाखाय सायख’नांगौ।
0.3 ग्राम लिरथायनि आरो 0.7 सोरगिदिंथायनि जोलैफोरखौ गाहाम होननानै हमनाय जायो।
किल’फा जोलैआव 2 ग्राम हारै चेरेसिन मुंनि रासायनिक पाउदार लगाय नांगै।
जोलै बेगर फोनायनि सिगां 24 धन्टा दैआव सोमनानै दोननांगौ।

जोलै बेगर फोनाय:

मोनफ्रोमबो जोलै बेगरखौ 1 चे:मि:गोथौआव आरो 15 चे:मि:जानथायै फोनांगौ, जाहाथे मोनफ्रोमबो ख’थायाव 8000 (2के,जि,) जोलै बेगर फोनो हायो।
जोलै बेगर फोनायनि उनाव जोलैथिलिखौ जिगाबजों गोबायै खोबनानै दै सारनानै होनांगौ।
जोलैथिलिनि अनगायै पलिथिन बेगआवबो जोलै फोनो हायो 15*20 चे:मि:महरनि पलिबेगआव 1:1:1ज’खायै बाला, हा आरो गोबोरखिनि लगायथायखौ सोनानै जोलै बेगरखौ फोनो हायो।
खिलिनायनि उनाव मोनफ्रोमबो बेगआव मोनफाल’फुलि दोननांगौ।

पलिथिन बेगआव पुलि बोस्लायनाय:

जोलैथिलिआव पुलिफ्रा 2-3 दान थानायनि उनाव बिसोरखौ पलि बेगआव बोस्लायनो हायो।
गोजौआव मख’नाय बादि पलि बेगआव बाला, हा आरो गोबोरखिनि लगायथायखौ सोनानै पुलिफोरखौ बोस्लायनाय जायो, जाहाथे उनाव लांलाय-लाबोलाय आव सुबिदा जायो।
साननैसोनि उनाव पुलिफ्राव दै सारनाया जोबोद गोनां।
लांलाय-लाबोलाय खालामनाय समावजोथोन लानाया गोनां।

चोमथिलिआव पुलि गायनाय आरो हासार बाहायनाय:

गायनायनि थाखाय 9-12 दाननि चोम पुलिफोरखौ चोमथिलिआव लांनांगौ।
सिगांआवनो लाहार-फाहार खालामनानै लानाय चोमथिलिआव 3 मिटार जान्थायै 1:1:1 ज’खाआव हाख’र खुरनानै मोनफ्रोमबो हाख’राव 1.5 किउबिक फित गोबोरखि गोरान आरो 5%एलड्रिन बाहायनानै पुलिफोरखौ गायनांगौ।
पलिबेगआव थानाय पुलिफोरखौ गायनायनि सिगां पलिबेगखौ जोथोनै बोखारनानै आरो रोदाफ्रा अज’थ मोनाजासे हाख’रआव गायनांगौ।
बेबायदि गायनाय पुलिफोरखौ सम-सम सिखोन-साखोन खालामनानै गुदिआव हा बोखोनानै एबा जाबदेरनानै होनांगौ।
मावगिरिफोरखौ गोबोरखि गोरानखौल’बिफांआव बाहायनो सुबुरुन होनाय जायो मानोना रासायनिक हासार बाहायनायनि सिगां हानि आखुथायखौ आनजाद नायनाया जोबोद गोनां जाय मावगिरिफोरनि थाखाय गोबां समावनो हाथाव-थाव नङा।
हासार बाहायनो थाखाय बिफांनि गुदिनिफ्राय 2 फुतसो जान्थायाव 6-8 इन्सि सो गोथौ मोनफा बेंख’न खालामनानै बावहाय हासार होनानै हाजों खोबनानै होनांगौ।
गोबोरखि हासारब्ला फांफा बिफांआव 0.5 चि. एफति आरो रासायनिक हासारब्ला फांफा बिफांनि थाखाय 40 ग्राम इउरिया, 60 ग्राम सुपारफसफेत आरो 15 ग्राम प’थास लगायनानै बाहाय नांगौ।

बिफांनि ख’र दानसनायनि आदब-खायदा:

बिफांनि बैसोआ बोसोरथाम जाब्ला बिफांनि ख’र एबा बिजौखौ आरो खाथि-खालानि दालायफोरखौ दानसनांगौ।
बोसोरबा उनाव बिफां फोरखौ नांगौ बादियै 5-6 फुत गोजौआव दानसनानै खाथि-खालानि दलायफोरखौ जाखुमा खालामनो नाजानांगौ।