इन्दि रेचम एमफौ पिसिनाय

सा-सानजा ओनसोलाव मोनब्रै रोखोमनि रेचम एम्फौ जेरै मुगा, इन्दि, पाट आरो टसरखौ फालांगियारि बिथिंजों फिसिनाय जायो। रेचम एम्फौखौ सरासन्स्रायै मोननै बाहागोआव राननाय जायो-पाट एम्फौ आरो हाग्रायारि एम्फौ(मुगा, इन्दि, टसर)। आसामाव पाट एम्फौनि अनगायैबो मुगा आरो इन्दि एम्फौ फिसिनाय जायो। इन्दि रेचमनि माखासे एखुथा आखुथाइनि थाखाय बेनि दिहुन्थायआ बांनाय नुनो मोनदों।

हाग्रायारि रेचमनि गेजेराव इन्दिआनो एखुथा नआव फिसिग्रा एम्फौ।
बोसोरनि मोनफ्रोमबो दानआव बिखौ फिसिनो हायोब्लाबो मार्च –एप्रिल आरो सेपतेम्बर-आगस्त दानआ जोबोद मोजां दान।
गुबुन रेचमनि रुजुनायाव बियो जोबोद खस्थ सहायनो हायो, लोगोसे बेरामबो सहायनो हायो फिसिनायावबो गोरलै।
इन्दि रेचम फिसिनायनि बांसिन हाबाखौनो आइजोफ्रा मावो बेनिखायनो आइजो माहारिनि रां आरो मदतनि थाखाय बियो मोनसे गाहाम राहा।
इन्दि खुन्दुं थुननो थाखाय एम्फौखौ बुथारनो गोनांथि गैया, जायनि थाखाय बिखौ अहिंसा रेचम होननानै मिथिनो मोनो।
इन्दि एम्फौआ गोजौ थाखोनि प्रतिन-जनजाथिफोरनि गेजेराव बियो जोबोद बाखनायजाथाव जाग्रा मुवा।
गोजौ थाखोनि आदबजों 100 बां जो इन्दि सिखिरि फिसिनानै इन्दि खुन्दुं आरो एम्फौनिफ्राय 25-35 सानआव 15000 रोजासो रां खामायनो हायो।

इन्दि एम्फौ फिसिनायः

इन्दि एम्फौ फिसिनायखौ मोननै बाहागोआव राननाय जादों-गोरलै एम्फौ फिसिनाय- 2 थि थाखोनिफ्राय 3 थि थाखोसिम आरो उनथारनि एम्फौ फिसिनाय- 4 थि थाखोनिफ्राय 5 थि थाखोसिम।
जातिः बर’दवा, टिटाबर कक्राझार बायदि बायदि । लस-2 मुंनि गोबां होनो हानाय गोजौ ।
जाग्रा बिफाः इन्दि बिलाइआ बयनिख्रुइबो साबसिन बिलाइबाबो गोबां बरपाट, बरकेसेरु आरो केसेरु बिफांफोरा इन्दि फिसिग्राफोरनि थाखाय जोबोद मुलाम्फा गोनां ।

गोरलै एम्फौ फिसिनायः

एम्फौ फिसिनायनि सप्तासे सिगाङावनो एम्फौ फिसिग्रा न’आरो आइजें आइला फोरखौ 5 जौखोन्दो ब्लिसिं पावदार लगायथायजों सुस्रानानै लानांगौ । गोरलै एम्फौ फोरखौ एखुथायै जोथोन लानांगौ ।
बिदैनिफ्राय एम्फौ जागिनाय लोगो लोगो गोरलै जारोम बिदै गोनां बिलाइ जगायनानै होनांगौ।
बिलाइ गोरलैआव एम्फौफोरा मानबायनानै गाखोजोबनायनि उनाव संग्रायाव बोस्लाय नांगौ ।
सेथि, नैथि आरो थामथि सानाव जागिनाय एम्फौ फोरखौ गुबुन गुबुन संग्रायाव दोननांगौ।
गोरलै एम्फौ फोरखौ आखायजों दांनो नाङा । सिखोन साखोन खालामनाय समाव जेब्लायबो खेबजां बाहायनांगौ ।
संग्रायाव पेराफिन पलिकटेट लेखा बिलाइ बनानै होनांगौ ।
एम्फौ फिसिनाय संग्रायखौ गुबुन मोनसे संग्रायजों खोबनानै हानांगौ, जाहाते एन्जर, माइनाव आरो गुबुन गुबुन हामा खालामग्रा एम्फौफ्रा खहा खालामनो हाया ।
संग्रायनि सोरगिदिं दैयाव सोमनाय फम बाहायनांगौ जाहाते बिलाइ गोरलैफ्रा गोरलैयैनो राना ।
एम्फौआ गुस्लायनाय समाव बिलाइ होनो नाङा। 90 जोखोन्दो एम्फौआ गुस्लायखांनायनि उनावसो बिलाइ होनांगौ ।
एम्फौ फिसिनाय न’आ गुसु आरो गोरान थाथि जानांगौ, बेनि अनगायैबो नांगौ रोखोमै खोरखि गोनां, बार हाबलाय ओंखारलाइ खालामनो हानाय आरो गाहाम सावस्रीनि राहा थानांगौ ।

दासान्दि सेलिफुनाय इन्दि एम्फौ फिसिनायः

उनथारनि इन्दि एम्फौ फिसिनायनि थाखाय सोलिबोनाय गुबुन गुबुन राहाजों फिसिनाय जायो जेरै-बिलाइनि मुथा खानानै बैसांआव फिसिनाय प्लाष्टिक ट्रे एबा संग्रायाव फिसिनाय।
गोजौनि मोननै राहाजों गोबां जायगा, मावगिरिफोर गोनां जानायनि अनगायैबो रां खरसा आबो गोबां जायो। बे उसुबिदाखौ नोजोर होनानै बाङाय रां बाहायनानै औवाजों बाहायनाय थाम खोलोबनि बैसां दिहुननाय जादों।
एसेल’जायगायावनो गोबां एम्फौ फिसिनो हायो बे बैसांखौ बाहायनानै । गोदो गोदायनिफ्रायनो सोलिबोनाय संग्राय एबा मुथा खानानै एम्फौ फिसिनायनिख्रुइ सानाव गोबां एम्फौ फिसिनो हायो ।
सिखोन साखोन खालामनायाव एसेल सम नांगौ ।
ब्रैथि आरो बाथि थाखोनि एम्फौ फिसिनो थाखाय बे राहाया जोबोद खाब जानाय ।
बे बैसांखौ 2 मिटार गोलाव आरो से मिटार गुवार औवानि जे हेबनायजों थाखोथाम महर होनानै लुफुंनाय जायो ।
बे जे हेबनाया एम्फौ गलांजानाययै गुदुंफ्रा से बर्ग चेन्टिमिटार ज’खानि जानांगौ ।
मोनफ्रोमबो जेनि गाहायाव एम्फौ खि बुथुमनो बस्था खानानै होनांगौ ।
औवाजों बानायनाय 2-2 मिटार (गोलाव) x0.75 मिटार (गुवार) x1.60 मिटार (गोजौ) ज’खानि थाम थाखोनि बैसांआव 25-30 जो सिखिरिनि एम्फौ फिसिनो हायो ।
(सिद्दक आली आहमेद, गोनोखोगिरि) राव सोलाइदों- जन्मेजय ब्रह्म चौघुरि ।